Hvenær er síðasti sólardagur?

Allir vita hvenær fyrsti sólardagur er á Siglufirði: 28. janúar þegar  sólin skín um alla Eyri og drukkið er sólarkaffi með pönnukökum. Og í skólanum syngja krakkarnir ljóðið „Til sólarinnar“ eftir Hannes Jónasson.

En það hefur ekki vakið sama áhuga hvenær sólargeislarnir smjúgja síðast yfir fjallabrúnir í botni fjarðarins. Síðustu daga hafa nemendur og kennarar í grunnskólanum fylgst með sólskininu og unnið verkefni í því sambandi eins og sjá má á heimasíðu 1. og 2. bekkjar http://grunnskoli.fjallabyggd.is/s05 .

Dagana 11. -13. nóvember sást vel til sólar en þann 14. var alskýjað. Í gær þann 15. skein sólin í skýjum yfir Hólsdalsbotni eða bak við botnfjöllin stutta stund. Ekki var hægt að greina það hvort hún hefði skinið yfir Eyrina en efstu hús voru böðuð sólskininu. Svo enn er það ómælt eða ósannað hvor dagurinn það er 14. eða 15. sem þessi móðir alls lífs vermir okkur á Siglufjarðareyri í síðasta sinn ár hvert.

En hvernig skyldi þessu vera háttað í Ólafsfirði eða Héðinsfirði?

Texti og myndir: Guðný Róbertsdóttir