Jonathan Harris með fyrirlestur 30. mars kl.20:00 í Tónskólanum.

Listamaðurinn og tölvunarfræðingurinn Jonathan Harris, sem hefur dvalið í Herhúsinu og Sæluhúsinu á Siglufirði í tæpa sex mánuði, heldur fyrirlestur um vinnu sína og verkefnið sem hann hefur þróað hér síðastliðið sumar og í vetur, í Tónskólanum við Aðalgötu miðvikudaginn 30. mars kl.20.



Jonathan lærði tölvunarfræði í Princeton University í Bandaríkjunum og í verkum sínum notar hann þá tækni í bland við myndlist, grafíska hönnun, mannfræði og frásagnarlist.
Verk hans snúast aðallega um að skoða mannlegu hliðar internetsins og að nýta tæknina til að þróa listina að segja sögu í heimi þar sem samskipti manna eru að verða stöðugt ýktari og brotakenndari.
Meðal helstu verka hans má nefna leitarvél fyrir mannlegar tilfinningar, tímahylki, innsetning um stefnumót á netinu og óhefðbundna heimildarmynd um hvalveiðar inúíta í Alaska.
Allir velkomnir á miðvikudagskvöld, einstakt tækifæri til að sjá verk hans lifna við, aðgangur ókeypis.