Kjör á Íþróttamanni ársins í Fjallabyggð

Fréttir

Kjör á Íþróttamanni ársins í Fjallabyggð

Íþróttamaður Fjallabyggðar 2011 Sævar Birgisson

Sú nýbreytni var tekin upp í ár við val á afreksfólki í íþróttum í Fjallabyggð að Kiwanisklúbburinn Skjöldur og Ungmenna- og íþróttasamband Fjallabyggðar (UÍF) sameinuðust um val á efnilegustu og bestu íþróttamönnum í Fjallabyggð. Í gærkvöldi stóðu félögin fyrir hátíð þar sem valið var kunngjört.

Undirbúningur hefur staðið nokkuð lengi og hafa nefndir sem kosnar voru af sínum félögum unnið ötuglega að þessari hátíð. Við kjörið var stuðst við nýjar reglur sem félögin komu sér saman um, en þær eru byggðar á fyrri reglum sem notaðar voru við kjör íþróttamanna Ólafsfjarðar og Siglufjarðar auk þess að taka mið af reglum Íþróttasambands Íslands. Í flokknum 13-18 ára eru útnefndir ungir og efnilegir íþróttamenn í hverri grein, strákur og stúlka, en í flokki 18 ára og eldri er aðeins útnefndur einn íþróttamaður frá hverju félagi og úr þeim hópi er íþróttamaður ársins valinn.

Þessi hátíð fór fram í Allanum í gærkvöldi og sóttu hana um 150 manns. Fjallabyggð bauð upp á veitingar, dregið var í happdrætti sem öll börn á hátíðinni tóku þátt í og voru vinningarnir frá Siglósport auk þess sem nokkur tónlistaratriði skreyttu dagskrána.

Íþróttamaður Fjallabyggðar 2011 var kosinn Sævar Birgisson skíðamaður. Árangur Sævars á árinu er glæsilegur: Íslandsmeistaratitill í karlaflokki bæði í sprettgöngu og 10 km göngu með hefðbundinni aðferð. Þetta urðu fyrstu Íslandsmeistaratitlar Skíðafélags Ólafsfjarðar eftir nokkurra ára bið í karlaflokki. Sævar var einnig í öðru sæti í 15 km göngu karla með frjálsri aðferð auk þess sem hann gekk þriðja sprett í boðgöngusveit SÓ sem varð í öðru sæti á sama móti. Sævar var valinn í A-landslið SKÍ og æfir íþrótt sína af miklu kappi, hann er mikil fyrirmynd fyrir iðkendur félagsins. Langtímamarkmið hans er að ná lámörkum fyrir Ólympiuleikana 2014 sem fram fara í Rússlandi. Sævar æfir á þessu ári í kringum 650 klst. og mun keppa og æfa erlendis nú eftir áramótin.

Í ár urðu þessir íþróttamenn fyrir valinu í einstökum greinum:

Skíði 13-18 ára: Alexía María Gestsdóttir og Jón Óskar Andrésson.

Tennis og Badminton 13-18 ára: Jakob Snær Árnason og Guðrún Hulda Ólafsdóttir, 18 ára og eldri Arnar Þór Björnsson.

Hestaíþróttir 13-18 ára: Finnur Ingi Sölvason og Eva Dögg Sigurðardóttir, 18 ára og eldri Guðlaugur Magnús Ingason.

Íþróttir fatlaðra 13-18 ára: Sigurjón Sigtryggsson.

Frjálsar íþróttir 13-18 ára: Patrekur Þórarinsson og Salka Heimisdóttir.

Knattspyrna 13-18 ára: Hlynur Örn Hlöðversson og Ingibjörg Ellen Davíðsdóttir, 18 ára og eldri Ingimar Elí Hlynsson.

Golf 13-18 ára: Davíð Fannar Sigurðsson og Brynja Sigurðardóttir, 18 ára og eldri Sigurbjörn Þorgeirsson.

Auk þess var Björn Þór Ólafsson heiðraður fyrir mikið og óeigingjarnt starf að íþróttamálum í Ólafsfirði.

Verðlaunahafar

Guðmundur Skarphéðinsson forseti Skjaldar stjórnaði dagskránni

Guðný Helgadóttir formaður UÍF flutti ávarp

Jakob Snær, Sævar, Jón Óskar og Alexía María

Guðrún Hulda og Jakob Snær

Verðlaunahafar

Formaður UÍF Guðný Helgadóttir að afhenda Íþróttamanni Fjallabyggðar styrk sem félagið veitir árlega.

Sturlaugur Kristjánsson flutti ljúf lög

Tónlistaratriði frá Tónskóla Fjallabyggðar: Hörður Ingi Kristjánsson

Tónlistaratriði frá Tónskóla Fjallabyggðar: Haukur Orri Kristjánsson

Þórarinn Hannesson og Sturlaugur Kristjánsson fluttu lag eftir þann fyrr nefnda

Salka Heimisdóttir fékk viðurkenningu fyrir frjálsar íþróttir en gat ekki verið viðstödd afhendinguna. Bróðir hennar Jóel tók við viðurkenningunni fyrir hennar hönd.

Björn Þór Ólafsson var heiðraður fyrir óeigingjarnt starf að íþróttamálum í Ólafsfirði.

Texti: GJS

Myndir: Gísli Rúnar Gylfason. Hann spilaði nokkur lög á gítar en engin mynd er af honum.

Til baka