Af siglfirsku kríunum.
Fjölmiðlar hafa fjallað um viðkomu íslenska kríustofnsins að undanförnu. Kríuvörp víða um land hafa farið illa vegna ætisskorts í hafinu.
Hér á Siglufirði vegnar henni vel þrátt fyrir kuldatíð í vor. Fyrstu ungarnir eru að skríða úr eggjum þessa dagana eins og meðfylgjandi myndir sýna. Óvenjulegt er að vísu að í flestum hreiðrum er aðeins eitt egg en í bestu árum eru þau tvö til þrjú. Ætla má að ekki færri en 500 kríur verpi hér í firðinum og e.t.v. um 1200 kríur séu hér hvert sumar í okkar miklu fuglaparadís.
Krían, þessi glæsilegi fugl, er óvinsæl meðal margra vegna „grimmdar“ þegar hún ver afkvæmi sín. En Krían ekki bara eitt besta dæmi náttúrunnar um færni og þrautseygju heldur er hún í seinni tíð eins tákn hins auðuga en jafnframt viðkvæma lífríkis Íslands. Ef einn hlekkur í þeirri keðju rofnar þá fer fleira að bresta - og kannski kemur að því að alvarlegur viðkomubrestur verði í „matarkistunni“ Siglufirði.
Texti og myndir: ÖK.
Athugasemdir