Nonni Björgvins með ljósmyndasýningu í Gallerý Rauðku

 

Hann er líka alveg hörku ljósmyndari drengurinn. Ég kíkti við hjá honum niður í Gallerý Rauðku eða Bláa húsinu nánar tiltekið. Nonni er að setja upp ljósmyndasýningu sem verður opin alla daga frá 12:00 - 17:00 fram til 2. ágúst.

 

Megnið af myndunum sem hann er að sýna hafa einhverja tengingu við vatn og eins og Nonni segir sjálfur "er þemað í mörgum myndanna vatn í ýmsu formi sem brýtur ljósið og skapar skugga og merkilega liti".

 

Nonni segir að hann hafi fyrst fengið áhuga á ljósmyndun á Sigló fyrir mörgum árum og var Róbert Guðfinnsson hans aðal kennari og lærifaðir í ljósmynduninni.

 

 Nonni segir að hans lífsmottó sé að lifa í núinu og hugsar um myndatökuna sjálfa út frá því. 

 

Myndirnar eru allar alveg meiriháttar og það er greinilegt að hann hefur gott auga fyrir myndefni.

 

 Það sem ég tók eftir voru hlutir sem eru til dæmis oft eða alltaf til staðar hérna á Sigló en maður hreinlega tekur ekki eftir sökum þess að þetta er einfaldlega of nálægt manni. En eins og er býr Nonni í Svíþjóð og margar myndirnar eru teknar þar. 

 

Ég get hiklaust mælt með þessari sýningu og hver veit, hugsanlega geturðu keypt þér flotta mynd hjá honum af "núinu" sem einu sinni var.