Nýr íslenskur þáttur fyrir börn og unglinga á RÚV

 

Glænýr þáttur fyrir börn og unglinga hefur göngu sína á RÚV 1. febrúar næstkomandi. Þátturinn ber nafnið Ævar vísindamaður og er fyrsti þáttur sinnar tegundar í íslenskri dagskrárgerð, þar sem kastljósinu er beint að vísindum fyrir börn og unglinga.
Ævar vísindamaður hefur verið reglulegur gestur í Stundinni okkar síðustu fimm árin, en vegna mikilla vinsælda hefur hann nú fengið sinn eigin þátt. Þátturinn sem fer í loftið laugardaginn 1. febrúar er sá fyrsti af alls átta þáttum, sem allir eru 25 mínútur að lengd.

 

Það gengur á ýmsu í þáttunum; áherslan er lögð á að kveikja áhuga á vísindum og notar Ævar vísindamaður hinar ýmsu aðferðir til þess. Sem dæmi má nefna ferð Ævars og Sprengjugengis HÍ til Patreksfjarðar þar sem þau bræddu bíl, 700 lítra slímblöndu sem Ævar bókstaflega sökkti sér í, Boltaland IKEA sem var sprengt í loft upp með fljótandi köfnunarefni og svo tilraun sem rataði í fréttirnar; þegar Ævar klifraði upp Perluna með tveimur ryksugum.

 

Stórleikarar í hlutverkum vísindamanna!
Vísindamenn úr mannkyns- og bókmenntasögunni verða einnig til umfjöllunar og fékk Ævar nokkra af helstu stórleikurum þjóðarinnar til að bregða sér í gervi þeirra. Ingvar E. Sigurðsson er t.d. tímaferðalangurinn úr skáldsögu H.G. Wells,Þórunn Arna Kristjánsdóttir er Marie Curie, Snorri Engilbertsson er Dr. Victor Frankenstein og Jóhannes Haukur Jóhannesson er sjálft skrímslið.

 

Í haust biðlaði Ævar vísindamaður til allra barna og unglinga á Íslandi og efndi til tilrauna-myndbandakeppni. Viðtökurnar urðu framar öllum vonum, en yfir 100 myndbönd bárust frá bæði einstaklingum og bekkjum alls staðar að af landinu. Dómnefndin, sem m.a. inniheldur rektor HÍ, situr nú sveitt að störfum við að velja sigurvegarana.

 

Ævar vísindamaður er leikinn af Ævari Þór Benediktssyni, sem jafnframt skrifar þættina. Eggert Gunnarsson leikstýrir. Þættirnir eru unnir í samstarfi við Sprengjugengið úr HÍ, Marel og Vísindavefinn.

Allar nánari upplýsingar má finna á www.ruv.is/aevar