Paradís á tröllaskaga.

Fréttir

Paradís á tröllaskaga.

Tröllaskagahringurinn.

„Tröllaskaginn er stórbrotið svæði á Norðvesturlandi þar sem ný tækifæri til ferðamennsku sköpuðust eftir opnun Héðinsfjarðarganga, í október 2010. Göngin tengja Siglufjörð og Ólafsfjörð, með viðkomu í eyðifirðinum fagra, Héðinsfirði.

„Með tilkomu ganganna hefur opnast nýr hringvegur um Tröllaskagann, sem er um 249 kílómetra langur út frá þjóðvegi 1 og býður upp á skemmtilegt ferðalag þar sem fjölmargt er að sjá og gera á leiðinni.

Frá Skagafirðinum liggur leiðin um Sturlungaslóðir að Hjaltadal, þar sem keyra má heim að Hólum, einum merkasta sögu- og menningarstað landsins. Næsti viðkomustaður á leið út skagann er einn elsti verslunarstaður landsins, Hofsós. Þar er að finna fjölda gamalla húsa, að ógleymdu Vesturfarasetrinu. Sundlaugin á Hofsósi þykir líka ein sú myndrænasta á landinu.

Næstur er Siglufjörður, nyrsti kaupstaður á Íslandi. Óvíða eru tengslin við undirstöðuatvinnuveg Íslendinga nánari en í þessari fyrrum höfuðborg síldveiðanna í Norður-Atlantshafi og tilvalið að rifja þau ævintýri upp með heimsókn í Síldarminjasafnið. Frá Héðinsfirði voru samgöngur erfiðar og byggð lagðist þar í eyði á síðustu öld. Um fjörðinn liggja fagrar gönguleiðir sem krefjast ekki lengur mikillar fyrirhafnar eftir að göngin opnuðu.

Bæjarstæði Ólafsfjarðar er sérstaklega fallegt inn á milli 1000 metra hárra fjalla. Bæði þar og í nágrannabænum Dalvík er fjölbreytta afþreyingu að finna, s.s. golf og hvalaskoðun, sjóstangaveiði og fjallgöngur. Frá Árskógssandi, í Dalvíkurbyggð, eru svo daglegar siglingar út í Hrísey á Eyjafirði. Þá eru ónefndar allar litlu perlurnar sem leyna á sér á ferð um Tröllaskagann.”

Mynd og texti: Morgunblaðið birt með leifi.