Sigurjón þrefaldur Íslandsmeistari

Sigurjón á verðlaunapalli

Á sunnudaginn tók frjálsíþróttakappinn Sigurjón Sigtryggsson þátt í Íslandsmóti fatlaðra í frjálsum íþróttum en mótið fór fram í frjálsíþróttahöllinni í Laugardal í Reykjavík. Sigurjón keppti í fjórum greinum að þessu sinni, í flokki 16-17 ára, og kom heim hlaðinn verðlaunum. Hann bar sigur úr býtum í þremur greinum: 60 metra hlaupi, 200 metra hlaupi og kúluvarpi og varð annar í langstökki.

Sigurjón hefur tekið miklum framförum í hinum ýmsu greinum frjálsra íþrótta undanfarin ár og bætti fyrri afrek sín verulega á þessu móti. Hann undirbýr sig nú af kappi fyrir Special Olympics leikana í Aþenu í sumar og árangur hans á þessu móti sýnir að hann er svo sannarlega á réttri leið.