Skíðafélag Siglufjarðar 90 ára
Skíðafélag Siglufjarðar var stofnað 8. febrúar 1920 og fagnar því 90 ára afmæli í dag. Í tilefni af afmælinu var ákveðið að setja upp litla sýningu í glugga KS skrifstofunnar, en verið er að vinna að söfnun gripa fyrir væntanlegt skíðaminjasafn á Siglufirði. Í Sparisjóðnum er svo myndasýning til heiðurs skíðaíþróttinni.
Í tilefni dagsins bíður skíðasvæðið öllum frítt í fjallið í dag og kaffi, kakó og kökur í skíðaskálanum.
Siglfirðingar sköpuðu sér góðan orðstír fyrir afrek sín á skíðum og áttu þeir marga af fremstu skíðamönnum landsins á 20. öld. Siglufjörður hafði þá sérstöðu að í þessu litla bæjarfélagi störfuðu tvö skíðafélög um árabil. Fyrsta skíðafélagið var stofnað árið 1920 og markaði það upphaf skíðaíþróttarinnar sem keppnisgreinar. Sumarið 1936 varð klofningur innan félagsins og stofnað var annað félag sem hlaut nafnið Skíðafélagið Siglfirðingur, síðar nefnt Skíðaborg. Árið 1952 voru félögin sameinuð í Skíðafélag Siglufjarðar – Skíðaborg. RMH
Athugasemdir