Upplýsingamiðstöð ferðamála í Fjallabyggð lokar

Fimmtudaginn 1. september n.k. verður upplýsingamiðstöð ferðamála á bókasafninu á  Siglufirði lögð niður. Starfsemi upplýsingamiðstöðvarinnar á bókasafninu hófst í byrjun júní  og hefur gengið mjög vel  að mati starfsmanna sem og gesta sem margir hafa lýst ánægju með þjónustuna.  

Starfsmenn upplýsingamiðstöðvarinnar á Siglufirði í sumar voru þau Hallgrímur Páll Sigurbjörnsson upplýsingafulltrúi og Rósa Bjarnadóttir forstöðumaður Bóka- og héraðsskjalasafns og upplýsingamiðstöðvar.

Á tímabilinu 6. júní – 29. ágúst heimsóttu 2462 gestir upplýsingamiðstöðina á Siglufirði með fyrirspurnir um m.a.: Gönguleiðir í Fjallabyggð og nágrenni, söfn og gallerí, ferðaþjónustu í Fjallabyggð og á Tröllaskaga, veitingastaði, sérstöðu Siglufjarðar.

Að auki má nefna að útlendingar, sérstaklega ferðamenn frá Þýskalandi, Austurríki og Sviss spurðu töluvert um skíðasvæðið á Siglufirði og um Fjallabyggð sem ferðamannastað og gistimöguleika á veturna.

Framtíð upplýsingamiðstöðvar ferðamála í Fjallabyggð, sem hefur starfsleyfi frá Ferðamálastofu, er óráðin en nokkar fyrirspurnir bárust um starfsemina og framhald hennar frá erlendum ferðaþjónustu- og kynningaraðilum sem setja vildu upplýsingar um starfsemina í kynningarrit sín.

Texti: Aðsendur

Mynd: GJS