Vélsleðaferð

Síðastliðna helgi var alveg rjómablíða á Sigló og tilvalið skíða, bretta og vélsleðaveður. Á laugardaginn þá skelltum við okkur á skíði í Skarðinu sem var alveg virkilega ljúft og skemmtilegt, færið gott og úrvals veitingar í skíðaskálanum.

 

Á sunnudeginum var vélsleðinn hins vegar tekin út úr bílskúrnum og aðeins prufað að sleðast.

 

Það var fullt af sleðum í fjöllunum á Tröllaskaga. Sem algjör nýliði í þessum vélsleðamálum hengdi ég mig á Ómar Óskarsson og Þröst Ingólfsson. Það er að sjálfsögðu alltaf bezt að fara með einhverjum sem er vanur og ætli Þröstur Ingólfsson sé ekki með reyndari mönnum í vélsleðamálunum á Siglufirði.

 

Ég allavega fylgdi þessum heiðursmönnum eftir og þeir fylgdust náið með því hvort ég kæmist ekki örugglega úr sporunum á litla vélsleðakrílinu mínu.

 

Tröllaskaginn er vægast sagt skemmtilegt svæði til að skoða yfir vetrarmánuðina á vélsleða.

 

Að sjálfsögðu var ég með Gopro vélina á mér, en reyndar þarf ég að læra ögn betur á það hvernig ég hef vélina stillta upp á að ná sem beztu útsýni. 

 

Vonandi hafið þið einhverja ánægju af því að skoða þetta myndband.