Vélsleðar fastir í Langeyrartjörn
Á mörgu var að taka á Sumardaginn fyrsta en það sem vakti einna mesta athygli bæjarbúa voru tveir vélsleðar sem fallið höfðu gegnum ísinn í Langeyrartjörn.
Um fjögurleitið í dag komu galvaskir sleðagarpar frá Mosfellsbæ til byggða eftir glæstan dag á fjöllum Tröllaskaga, í Siglufjörð komu þeir til að tanka áður en halda átti í grillveislu í Ólafsfirði.
Á leið sinni til baka lentu kapparnir hinsvegar í hremmingum þar sem ísinn á Langeyrartjörn gaf sig undan síðasta sleðanum og síðan öðrum sleða sem reyndi að koma honum til bjargar. Sátu þá tveir sleðar fastir í tjörninni.
Upphófust nú mikil björgunarstörf en augljóst var þó þegar Gestur Hansa mætti í kafarabúningnum að vanur maður var á ferð, þurfti hann þó engan kút enda tjörnin einungis rétt ríflega skósíð á dýpt. Eftir um hálfan annan tímann hafði sleðunum báðum verið bjargað á land og komið í dótakassann hjá Gunna Júll þar sem félagarnir rifu í sundur sleðana, trekktu af þeim vatninu, skoluðu af vélinni og kipptu þeim í gang. Mjög vanir menn voru þarna greinilega á ferð og ekkert í þessum aðgerðum sem vafðist fyrir þeim.
Sleðagarparnir héldu síðan til Ólafsfjarðar og skemmst er frá því að segja að þeir náðu í grillveisluna.
Greinilegt var að bæjarbúar voru mjög áhugasamir um björgunaraðgerðirnar og flykktust þeir á staðinn til að fylgjast með. Til tals kom að ef fleiri mundu mæta þyrfti að öllum líkindum að lengja Langeyrarveginn.
Athugasemdir